سياسة الاسترجاع

تقدري ترجعي إيه؟

تقدري تعملي استرجاع لأي قطعة من أوردرِك ولأي سبب.

يعني مش لازم يكون فيه عيب أو مشكلة في المنتج؛ لو غيرتي رأيك، أو حسيتِ إن الموديل مش مناسب ليكي، أو ببساطة مش حابة تحتفظي بالقطعة، تقدري تطلبي استرجاعها طالما مستوفية شروط الاسترجاع.

مدة الاسترجاع

الاسترجاع لازم يتم وينتهي بالكامل خلال 14 يوم من تاريخ استلام الأوردر.

ومهم تاخدي في اعتبارك إن الشحنة المرتجعة بتاخد عادةً من 3 لـ 5 أيام علشان توصلنا، حسب المحافظة ومكان التوصيل.

علشان كده لو قررتي ترجعي أي قطعة، يفضل تبلغينا بدري ومتستنيش لآخر أيام من فترة الـ14 يوم، علشان يبقى فيه وقت كافي إن عملية الاسترجاع تكتمل.

تطلبي الاسترجاع إزاي؟

لو حابة ترجعي الأوردر أو أي قطعة منه، كل اللي عليكي إنك تتواصلي معانا من خلال Instagram أو WhatsApp أو TikTok وتبلغينا إنك حابة تعملي استرجاع.

وإحنا هنتابع معاكي، ونوضحلك الخطوات والتكلفة الخاصة بالاسترجاع، وبعد تأكيد الطلب بنرتب معاكي استلام الشحنة من خلال شركة الشحن. 🤍

الشرط الأساسي لقبول الاسترجاع

عندنا شرط أساسي واحد:

إن المنتج يكون بنفس حالته وقت الاستلام ومايكونش تم استخدامه.

بعد ما الأوردر يرجعلنا، بنراجع القطعة ونتأكد من حالتها، ولو كل حاجة تمام بيتم استكمال إجراءات استرجاع المبلغ.

مصاريف الاسترجاع

في حالة استرجاع الأوردر بالكامل، بتكون كل مصاريف الشحن الخاصة بالأوردر على العميلة.

لكن زي ما وضحنا في بداية الصفحة، قيمة مصاريف الشحن بنرجعهالك في صورة Cashback، وتقدري تستخدميها كخصم على أول أوردر جديد تعمليه مننا بعد الاسترجاع. 🤍

لو فيه قطعة فيها مشكلة ضمن أوردر مكوّن من أكتر من قطعة

شركات الشحن اللي بنتعامل معاها مبتسمحش بتجزئة الأوردر وقت الاستلام، يعني لو الأوردر فيه أكتر من قطعة مينفعش تستلمي جزء وترجعي جزء مع المندوب في نفس اللحظة.

علشان كده، لو استلمتي الأوردر بالكامل وكان فيه قطعة فيها مشكلة ومقدرتيش ترجعيها وقت الاستلام بسبب نظام عدم تجزئة الأوردر، مصاريف استرجاع القطعة دي بتكون علينا بالكامل.

لأن في الحالة دي إحنا مش عايزينك تتحملي تكلفة إضافية بسبب نظام شركة الشحن. 🤍

الاسترجاع بيتم إزاي؟

بعد تأكيد طلب الاسترجاع، بيجيلك مندوب شركة الشحن علشان يستلم الأوردر أو القطعة المطلوب استرجاعها.

مهم تعرفي إن مندوب الاسترجاع مش بيقوم بفحص المنتج عندك؛ هو بيستلم الشحنة منك بس وشركة الشحن بترجعهلنا.

إمتى فلوس الاسترجاع بترجعلك؟

مندوب شركة الشحن مش بياخد منك مصاريف الاسترجاع وقت استلام الشحنة، ومش بيسلمك قيمة الأوردر نقدًا.

بعد ما شركة الشحن توصل الأوردر لينا، بنراجعه ونتأكد إن المنتج بنفس حالته ولم يتم استخدامه، وبعدها بنحول ليكي المبلغ المستحق بعد خصم مصاريف الشحن المطبقة على عملية الاسترجاع.

وعايزين نطمنك بخصوص الخطوة دي تحديدًا 🤍

دي طريقة الاسترجاع اللي بنشتغل بيها مع عملائنا من 2024، وعملية رد المبالغ بتتم من خلالنا بعد وصول الشحنة ومراجعتها. إحنا بنوضحلك الخطوات من البداية علشان تبقي عارفة بالضبط إيه اللي هيحصل من وقت ما المندوب يستلم الأوردر لحد ما فلوسك ترجعلك.

ثقتك فينا مهمة، وعلشان كده بنحب تكون كل خطوة واضحة ومعلومة قبل ما تبدأي عملية الاسترجاع.

لو طريقة الاسترجاع عندنا مش مناسبة ليكي

لو طريقة الشحن أو أسعار الاسترجاع من خلال شركة الشحن اللي بنتعامل معاها مش مناسبة ليكي، تقدري ترجعي الأوردر بالطريقة وشركة الشحن اللي تناسبك.

وبمجرد ما الأوردر يوصلنا ونراجعه ونتأكد إن حالته سليمة، بنقدر نسوي المبلغ المستحق معاكي بالطريقة المتفق عليها.

يعني مش لازم تكوني ملتزمة بشركة الشحن اللي بنتعامل معاها لو فيه طريقة تانية أريح أو أنسب ليكي.